كل عام ومصر بخير

والريس ريس والباشا وزير

كل عام والغنى بقا ينهب

وبياكل حق الفقير

كل عام ووزارة الغالى

بتسن ضرايب مناشير

كل عام وشبابنا العاطل

بقا بدقون والباقى فرافير

والصينى بيتباع فى بلدنا

وانا وانت قاعدين طراطير

وضحايا الاهمال بالكوم

وحوادث والشهدا كتير

وانفلونزا بقت انواع

معيز وطيور وكمان خنازير

كل عام والقمح الروسى

مستورد ومعاه صراصير

كل عام والشيخ فى الجامع

والقسيس يوعظ فى الدير

كل عام والدين بقا سلعة

نقاب وفتاوى وتكفير

كل عام ولسان الناس

بقا جزمة ومطواة وجنزير

كل عام والدورى باحمر

ولا فرقة من الاهلى تغير

كل عام وف كاس العالم

الخضر لافرقيا سفير

كل عام والغرب بيعلو

والعرب ناقر ونقير

كل عام نقفل على غزة

ونوصل ليهود مواسير

كل عام يا عراق يا سودان

لو تبعد عنكو الاحزان

كفايانا قصف وتفجير

كل عام ومصر بخير

كل ما يعلا صوتى واغنى

للشيشة ولسيجارة بنى

واغنى حتى للحمير

وكل عام انجح بالعافية

والمقبول اكبر تقدير

كل عام واصحابى بخير

شباب رجالة وبنات قمامير

كل عام وحبيبتى فى حلمى

بتوب ابيض والطرحة حرير

كل عام وانا املى ف ربى

هو سميع وعليم وقدير

تمت.

هو ليس وداعاً يا حب

مازال بصدرى يرقد قلب

ينبض آلاماً يخفق احياناً

يرسم او يكتب عنواناً

وينقب عن بقايا العشق

يصنع طائرةً ورقية

يغفو كورودٍ جورية

ويخالف كل طباع الخلق

طاف الاقطار العربية

وبنا اهراماً مصرية

وقصراً شامياً بدمشق

كان صديقا يخدعنى

اتعب اجفانى ارهقنى

كذبٌ مختلطٌ بالحق

قلبى هو لغز الالغاز

غرقى وطوق الانقاذ

قلماً حررنى من الرِِق

يعارض كل الاحكام

ويثير الرأى العام

وينازعنى فى الملك

تتعجبو من صمتى

بعد فراق المحبوب

انا حقاً لم ابكى

لم يكن لبناً مسكوب

كان ناراً ونهاراً

بات رماداً وغروب

هو ليس وداعاً يا حب

ابحث عن قدرى لاعود

تمت.
محمود قلماوى

لا تقرأى كلماتى
وتحاولى فهم السطور
انتى فى الصبا زهرة
وانا شاعر مخمور

حروفى كالوان الفراشاتِ

كاصوات الطيور

تطيب بحروفى جراحاتِ

وقلبى انا مشطور

واضئُ دروب العاشقين

بحروف اللؤلؤ المنثور

واغزو حصون الجميلاتِ

فاعود غانماً منصور

فاخشى عليكِ من غزواتى

من نزواتى

من قلبى الغيور

ارجوكِ ابتعدى …

لست انا من تنتظرين

انا طيفٌ يمر

فى دروب الكثيرين

لن احتمل اراكِ يوماً

امام عينى تنتحرين

لن اقبل يوم لقائى

على جِزعى تُصلبَين

اخشى ترمينى ظلماً

فى اقفاص المتهمين

وتقولى هو من خدعنى

واوهمنى بالحب سنين

لذلك سابرئُ قلبى

وساسجن دمعى حتى حين

لا تعشقى انفاسى..

فارغة من اى حنين

لا تشعلينى بانوثتك رجلاً

وتقتربى فتحترقين

لا تصدقى قولى شعراً

فانا كبيرُ الدجالين

أُمهد الشِعرَ فِراشاً

 إياكِ عليه تنامين

إياكِ تقعى فى شَرَكى

وطُعم شِباكى تبتلعين

من قال ان الحب انا؟

انتِ؟ على نفسك تكذبين

من قال العشق محرابى؟

انتِ؟ هل ستترهبنين؟

من قال الهوى دارى؟

انتِ؟ الى متى ستعتكفين؟

صغيرتى لن اقبل حباً

كاصناماً من الفخار

ولن اضاجع قصص الهوى

لانجب منها الافكار

كيف اقتل رجولتى؟؟

او اوءدها كما الكفار؟؟

من يرضى ان يربح فكرة

ويوصم نفسه بالعار

ابتعدى ..لم اقصد حبك

فقط اقتربت

سامحينى علّ الله يسامحنى

على ما اقترفت

تمت.

صباح الخير يا نواب

احنا اللى فتحنالكو الباب

ودخلتو نسيتو الاحباب

قفلتو وعلقتو اللوحة

ممنوع تصوير او اقتراب

وانا ابيع صوتى واتعشى كباب

وادوس الصح علشان انساب

وعصبية من غير اسباب

وناس قالتلى الصوت بثواب

صدقتهم لكن طلعوا سراب

لان ربى عن بالى غاب

هو بيرزق كله بحساب

جماعة جزمهم رافعين

وصعايدة قِبلى مِلًسَمين

وعيون مفتوحة لكن نايمين

واخوة فى دقون غرقانين

بيتكلمو على طول بالدين

وحريم عاملين روحهم فاهمين

دة وغير اللى منهم محبوسين

كانو فاكرين روحهم شاطرين

والكل موافق والايد رافعين

قبل النهاية فى كلمة حق

لو انساها ابقا لئيم

في ما يخاف من قولة لاء

عامل حساب يوم الدين

و يحط ايده فى جُحر وشَق

لا يخشى عقارب ولا تعابين

تمت.

فى عيونى اجمل موناليزا

من كل مكان بتضحكلى

من حضنها بتقربنى

من شط بحر ونهر نيل

علمتنى مافيش مستحيل

ولو الدنيا عليها تميل

تندهلى: يا واد يا تقيل

ارد واقول: يامو المنديل

جايلك ولو كان جسمى عليل

ببركَة من رب التساهيل

ودعوة من بعد الترتيل

اطيب جرحك بالمواويل

ونكتة مش محتاجة تاويل

يا مصر يامو النور قناديل

يا مصر اسمك فى القرآن

وَحى وتنزيل

لو كنتو نسيتو الهكسوس

طبعاً فاكرين اسرائيل

يا ام الدنيا انا مهما حاقول

كلامى كله عليكى قليل

والزينة الوان كرانيش كرانيش

ومسحراتى عامل درويش

وسحورنا مدمس ابو تحابيش

يابويا هاتلى فانوس

اياك تقول ماعييش

وياما فكى الكيس

دة مش وقت التحويش

وعيال بتضرب مدفع

كانهم فى الجيش

وبالذِكر صوته يلعلع

مجذوب ولابس خيش

من اول ليلة و فجر

 احفظ ادان الديك

حين سمعو صوت الذِكر

اباليس قالت يا فكيك

فى العشا و الفجر

فاكر زحمة جوامع

وساعة المغربية

فاكر سكوت الشوارع

فاكر نفسى زمان

بفانوس جانا رمضان

فاكر طعم الصيام

وموائد الرحمن

رمضان ايام جميلة

بسرعة تفوت وتعدى

بركة فى كل مكان

وخير فى بيتى ويَدى

وبعد كحك العيد

اشتاق لكٌنافة بلدى

تمت.

طاردنى قهرى

لحق بى استسلامى

فاودعونى زنزانتى الفردية

بلا تحقيق.. احكامهم عرفية

ولا مدة عقوبة..عقوبتى ابدية

فتهمتى شنعاء..ولن يقبلوا ديّة

لقد قتلت..عمداً قتلت

احلاماً اسميتها وردية

ولا اذكر اداة جريمتى

بيداى؟ سكيناً؟ام بندقية؟

لماذا هى لم تدافع؟

عن نفسها ..عن الوجودية

ولا اذكر اين قتلتها

فى قلبى؟ام براسى الجمجمية؟

كيف اقتل الواناً وحروفاً ابجدية

زهوراً حمراء وارجوانية

كيف اقتل من لم تمس الارض؟

معلقةً فى شرفتى القمرية

مؤكد هى لم تمت

دفنتوها نابضة حية

اخرجونى ازيل ترابها

احرقها بطريقة وثنية

اخرجونى احضر غيرها

باقلامى وطريقتى الفردية

تمت.

رسم اختى الجميلة هبه فؤاد

يا اسكندرية .. يا بت البحر

ابوكى عامل فتوّة

جاى اخطبك وف جيبى مهر

او اخطفك بالقوة

 خطابك كتير عاملين زحمة

انا افتكرته يوم الحشر

قالولى : لا دول معازيم

والعريس سيدى بشر

وعريس كمان شكله ابن ناس

الدنيا ف جيبه مقطورة

عرض المهر عربيات

وكام شاليه فى المعمورة

نزل عريس تانى من عربية

ليموزين ..نِمرها ممسوحة

عليها بدجات من هيئات

وناس سِككها مفتوحة

تشوفهم .. هاتعرفهم

اسال عليهم فى سموحة

وعريس لابس بدلة ونضارة

سوداا بتغطى العيون

ناس قالت بتاع سياسة

وكتير قالو تاجر افيون

ولقيت صبى طويل ونحيل

واكتافه من صخر .. منحوتة

اسمر ..عيونه كيف الصقر

منخار عريض

ومبسم اكبر من الفتفوتة

من قِبلى جاى لاسكندرية

يحوّش مهر لبهيّة

ولو اشتغل فى الكوتة

يا بحر هاتوافق على مين؟

حيتان بحرك ؟ولا الغلبانين؟

يا بت بحرى انا دوبت فيكى

وعلى فراقك بقيت مش قادر

وعشقت عجمى ومنشية

وشوارعك يا سيدى جابر

وسهرت اجمع فيروز

من انفوشى وكرموز

وقصر رمل فى ميامى

منقوش بمحار م الغالى

وشربت م المالح عشان بيا تحسى

ودعيت ربنا فى جامع المرسى

مهما اغيب ارجعلك تانى

ارجع ليكى .. الاقيكى

عروسة بتستنانى

تمت.

          اوعى تقول: محمود

          وماله شعرك منكوش

          ودقنك طويل ممدود

          شكلك واقع من قطر

          تكونشى يا واد محسود

محمود: يا عم انا محمود

         والشعر يتسرح

         والدقن لو ممدود..

         هانقصه يتصلح

         لكن القلم مكسور

         والفكر متكسح

         يا رب ما تكسبه

         ولا اشوفه يوم يربح

         كل اللى يوجع قلبى

         بلسانه راح يجرح

انا:      مالك يا واد قولى

         ضيعت فين صبرك ؟

         وان كان قلبه قسى

         القسوة مش طبعك

         حتى انت بتقول اخ

         لو زاد عليك وجعك

محمود: خايف لا بكرة يكون

         اصعب من امبارح

         خايف ابات مجروح

         اصحى اكون جارح

         خايف لا قلبى يموت

         يحلف ماهو مسامح

         وبايدى اقص الزرع

         حتى ولو طارح

         والصبر يصبح كره

         يحجز كل المطارح

انا:      اخرس كلامك دة

         والله اقطع لسانك

         انت تعرف الكره

         ههه يخرب شيطانك

         افتكر سيدنا يوسف..

         واخواته لو كان مكانك..

                          كان قال: يا رب حمدك

         وحّد .. رجع ايمانك

         يا محمود افتحلى قلبك

         وحكمنى فى لسانك

         وقوم انده حبايبك

         ورقك والوانك

         ولحد مانت تروق

         سيبنى ارسم بدالك

تمت.

ماتصدعنيش كفاية يا عم

سيب الواحد فى الهم

والزمن اللى حاله يغم

وهاقولك كفاية حرام

انا زهقت من الارقام

اسعار من غير لجام

وعلاوة يادوب عنوان

مانشيت بالالوان

مايوكلش اللى جعان

يضحكو بيه عالغلبان

ماتقوليش دا المكتوب

دا انت بقيدك مسحوب

مش شايف او معصوب

ويمكن مجبور مغصوب

بس ربك رب قلوب

عمره ما يحكم بالمقلوب

وما ينساش الغلبان

والناس من الجوع بتموت

قطرعليهم بيفوت

والقطرمركب حوت

وفتوة معاه نبوت

وفلوس فى ايدين هلفوت

بيغنى ويقول توت توت

وانا وانت فى طابو القوت

ياما تركب قطر الموت

يا تحته جسمك مفتوت

كلام وقولته من غير صوت

يمكن صح يمكن ملتوت

تمت.